Urrian helduko zaio berriro Nosferatu “Zinemaldia 70” zikloari

2022 abuztuak 29 • 9:30

Datorren urriaren 5ean hasiko da berriro Tabakaleran Donostiako Zinemaldiaren 70. urteurrenari (1953-2022) eskainitako Nosferatu zikloa. Zikloari joan den urtarrilean eman zitzaion hasiera Une histoire de vent (1988) filmarekin; Joris Ivens dokumentalgile nederlandar beteranoak zuzendutako azken filma.

Donostia Kulturak, Euskadiko Filmategiak eta Donostia Zinemaldiak, Tabakaleraren eta Institut Valencià de Cultura – Filmoteca de la Generalitat Valenciana-ren lankidetzarekin, antolatutako Nosferatu “Zinemaldia 70”ren hirugarren hiruhilekoan, hamaika film proiektatuko dira, 1988 eta 2010 urte bitartean Donostia Zinemaldiaren programaziotik igaro zirenak, eta erakustaldi honetan uda aurretik proiektatutako 26 filmei gehitzen zaizkienak.